U tboco froso maglele di şultonutho d’Erdoğan kqıtlo a neşe

U tboco froso tibeloyo maglele liholo di şultonutho d’Erdoğan kıqıtlo a’neşe b’Turkiya, b’Suriya ubı Fransa.

İ sferyawmo İsarloyto d’Jerosalem Post, mawdacla da neşe dkobın ağuno laşan dmitahwelın a’zedqaththe kmitahwın b’Turkiya xıd marıhbone, elo a’gabre dıksındi i marıhbonutho b’Suriya kmiyaqri b’Anqara xıd athlite awkith batle gabore.

İ sferyawmo İsarloyto d’Jerosalem Post, mşalatla bahro cali şultonutho dı Turkiya dkımşaçco i tuhmonoyutho dmitaqşiyo mqabıl da neşe, u grışla ste u zuhoro cala surotho di claymtho Deniz Poyraz dıkmahwiyo ebaye gahıxto, elo laşan a’yaminoye tuhmonoye dı Turkiya, Poyraz dıqtilowa bi şabtho dşaficina bu makıthbo di HDP dkıtyo b’Ezmir kımmathlo tehdid, cal dkıtwa claymtho hfito dlıkımaydowa i şultonutho d’Erdoğan di AKP.

İ sferyawmo İsarloyto bu tebo dıfrısla, kmawdıco da neşe b’Turkiya hawın nişo rişoyo li şultonutho tuhmonoyto d’AKP ba n’ışne haroyani. Uba vidyowiye dıkmıfrosi kmahwe u cnufyo dıkzoyıd mqabıl da neşe ba zabuqone dı Turkiya, baynothaye neşe dıkmımhoyi ma gabre. Bebzabno, i sferyawmo d’Jerosalem Post mawdacla dı Turkiya dkıtwa mraşahto li hadomutho du Huyodo d’Urifi, kmıthomo adyawma bu şedoro d’qatole m’Suriya lu athro dı Fransa, laşan dmaydi a’neşe hfite nişo elaye.

İ sferyawmo İsarloyto kımmo “a’şutose du tboco froso dkıtne noqufe di şultonutho dı Turkiya, bu zyudo da naqlat kmahwın a’neşe dkobın ağuno laşan a’zedqaththe xıd marıhbone, elo a’gabre dıkgurşi surotho cama zayne ucamani dıksındi a’marıhbone b’Suriya, kmiyaqri b’Anqara xıd batle athlite. U qatlo dı Deniz Poyraz kdome lu qatlo d’Havrin Xalaf dkıtwa claymtho hfito lo mzayanto udıqtilowa b’Suriya i şato da 2019. Ubi şato da 2013 sımwo swikast tloth neşe Kurdoye bi mditho dı Paris, ubi şato da 2020 tayisto Turkoyto qtiwola tloth neşe Kurdoye b’Suriya. U qatlo da neşeani bı Paris, b’Suriya ub’Turkiya latyo mede tasadof, elo falqo m’kampanya rwıhtır yo dıkmisomo mqabıl da neşe b’Turkiya mxasra, uba fenyotho d’Suriya dkıtne kbişe m’Turkiya mxasra hreto”.

Camgabıdathe, Jerosalem Post mawdacla d’Anqara kul dıkmarwıho i moruthayda hawxa ste kmaciqo a’zedqe di athto m’İdlıb hul Cafrin, hul Rişcayno u Jarablos, um’Libya hul Qatar. Wu medano hul darğo kıdocır li saqıbloyutho dıkmahwela u gabo d’AKP d’Erdoğan la zedqe da neşe uli msirutho dkıtle cam grub marıhbono da n’Ahunone Maşılmone dıdışle kul mede dışme zedqe di athto bu madınho mescoyo.