U tukoso İtaloyo d’UPP mtayable workshop calu teqwiyo du dawro di claymutho bu snoco du şuhlofo bgawe du kenşo

Bi mıştawtfonutho dı clayme u claymotho ma came mşahılfe d’Ninwe, u tukoso İtaloyo d’UPP mtayable workshop calu teqwiyo du dawro di claymutho bu snoco du şuhlofo bgawe du kenşo.

Camgabıdathe, mtayıb bi dayro d’Mor Bahnam udi hothayde Sara, cadcido marduthoyo leşan u terkiwo du şlomo udu teqwiyayde b’Ninwe.

Bu taro di tarmitho dışma; U fulhono magon leşan u şlomo b’Ninwe”, u tukoso İtaloyto d’UPP ubi mıştawtfonutho du şutoso da yadıcthone d’Fransa, mtayable athmıl workshop calu teqwiyo du dawro di claymutho bu snoco du şuhlofo du kenşo. U workshop dkıtyo falqo mi tarmitho dıkmısnodo mu Huyodo d’Urifi umi wazirutho di baroyutho d’Fransa, mıştawtaflele clayme u claymotho ma came u fenyotho mşahılfotho d’Ninwe.

I tahrazto du workshop mşarela bu mamlo dsımle u mşalo di tarmitho Cumer Alsalem dmahkele cali tarmitho du fulhono magon leşan u şlomo b’Ninwe, u aydarbo kımcadro bu teqwiyo du fulhono udu dawro di claymutho bi mşablonutho du kenşo mdinoyo, bnişo dmışrın a qetre kenşoye bi hiğmonutho d’Ninwe. Bıthır u mdarşono Safwan Alsufi mahkele calu dawro di claymutho bu teqwiyo du kenşo mdinoyo wu dawro da tukose du kenşo mdinoyo bu haqlo du şuhlofo.

Meqım mıd mıfloği a mıştawtfone l’grube du droşo, u workshop hthim bu mamlo di mdarşonitho Nağam Muhammad dmahkela calu sukolo du fulhono magon wa şıklat mşahılfe dkıtle. Camgabıdathe, UPP mtayable bi dayro d’Mor Bahnam udi hothayde Sara bi qastra d’Nemrud cadcido marduthoyo bu ışmo “itoxu dfulhina magon camıhdode. Lu cadcidano dsim leşan u şlomo b’Ninwe mıştawtafle menyono celoyo ma came d’Ninwe, beynothaye rişone tawdithoye.

U rişono di dayro qaşişo Yahqub Ciso bu mamlo dsımle grışle u zuhoro calu dawro dıkmıştace UPP bu teqwiyo du şlomo ubu bırbozo du mafhum du fulhono magon dilonoyith b’Nemurd, u mawdacle di dayrayde kımathıl qentrun di ciyeşe mşayanto bi fnitho. Bıthır ma mamle, i gudo Suryoyto du folklor mqadamla raqde camoye cam lbuşe marduthoye, u grub d’clayme d’Mawsal zmırlın la hadire. Bu huthomo du cadcidano, mtayıb glohe du rşomo, du nhoto, da şuğlone di ido u pazar dfris ebe medone mşahılfe.