U waziro di baroyutho du İran sımle socurutho lu athro du Iraq

U waziro di baroyutho du İran Mohammad Javad Zarif, sımle socurutho lu Iraq u laqi a mşale Iraqoye bi arişkoyto Boğdod. Bu zabno di socuruthothatheste, azze Zarif li duktho dıqtılwo eba u rabhaylawotho İranoyo Qassem Suleymani.

 U mede dıkgorış u zuhoro, di socuruthathe d’Zarif simo lu Iraq, bu zabno du rişwazire Iraqoyo Mustafa al Kadhimi gıdsoyım socurutho li Scudiye ulu İran.

U waziro di baroyutho du İran, mabdele adyawma socurutho lu Iraq, leşan ytawyotho cama mşale frişe du athro. Bu zabno di ytawto dhawile u rişwazire du Iraq Mustafa al Kazimi camu waziro di baroyutho du İran Mohammad Javad Zarif b’Boğdod m’akadle, du nişo dkıtle u Iraq dmıştace dawro hfito u msimono bu terkiwo di nihutho udu balans caman athrawotho şbobeyo.

A ytawyothani dsimi b’Boğdod, mtaybi bızabno du rişwazire al Kazimi kımhaydır ruhe dsoyım yawme dıtre socurutho li Scudiye dkıtyo athro saqıbloyo du İran. Bi taşdarto d’Al Kazimi kitoste u waziro du nafto, du kahrobo, du momuno udu quyomo u gıdloqın u Amiro Muhamad bin Salman b’Riyad leşan dırşi i methcadronutho dbeynothaye bu haqlo du momuno udu enerji.

Bebzabno al Kazimi, gdımdawım bıthır lu İranste wu Zarif makadle, di şultonuthayde kıtla sabro lu terkiwo d’methcadronutho qwitho camu Iraq. Lfuth u tbocofroso Iraqoyo, bi ytawtathe beyn du rişwazire Iraqoyo u Zarif drişi a esore beyn da 2 athrawotho wi sbutho di mşaynutho du qlimo.

Bi ytawtathe driş u qatlo du rabhaylawotho İranoyo Qassem Suleymani bu yarho d’Konun u haroyo ma hayle Amerikoye b’Boğdod. Bu zabno di socuruthathe, laqi u waziro Zarif u baramnayde u Iraqoyo Fuad Hussein u kmıntır bıthır dımdawım l’Arbil. Elo meqım dızze lu qlimo d’Kurdistan, sımleste socurutho li duktho dı qtılwo Qassem Suleymani u mahwele u iqorayde lu rabhaylawotho da Noture du Qawmo du İran.