U waziro di tarbitho du Iraq mıstaqbele u mdabrono gawonoyo du yulfono Suryoyo Cimad Salem Jajjo bu qentruneyde

U waziro di tarbitho di şultonutho du Iraq Cali Hamid Mıxlıf, mıstaqbele bu qentrunayde b’Boğdod, u mdabrono gawonoyo du yulfono Suryoyo Cimad Salem Jajjo.

Bi ytawtathe, u waziro di tarbitho mawdacle dhadiro’yo dsonıd a hfitwotho du maşıqlo du yulfono Suryoyo bu Iraq.

U mdabrono gawonoyo du yulfono Suryoyo bu Iraq Cimad Salem Jajjo, laqi u waziro di tarbitho Cali Hamid Mıxlıf bu makıthbayde di wazirutho bi arişkoyto d’Boğdod.

Bi ytawtathe, Jajjo mqadamle lu waziro di tarbitho talabe u renye mşahılfe bnişo dmıftıh u darbo qum da fulhone du tetimo da hfitwotho dilonoye di mdabronutho gawonoyto du yulfono Suryoyo, udu ferco du yulfono Suryoyo bi mdabronutho di tarbitho d’Boğdod.

Me gabo hreno, u waziro Mıxlıf bu mamlo dsımle mwasafle a fulhone dıksaymo i mdabronutho du yulfono Suryoyo, u mahwele’ste yasifutho la talabe u renye dımqadamle Jajjo.

Bebzabno, Mıxlıf makadle di waziruthayde hadırto’yo dsundo a fulhone u hfitwotho da mdabrınwotho du Iraq, bnişo dmişawşıt u maşıqlo du yulfono du athro. U waziro huleste amro dmicaqıb u maşıqlo du yulfono Suryoyo dıkmisım bu darbo du nawlo.