U yawmo du duxrono d’6 u 7 İlul da hjome cala mşihoye b’Turkiyawe

U maktabzabno d’Turkiya dkıtyo mşatso cala qtolcame u cala qtolğense da came, me kul zabno l’zabno hawi qatlo u jboro dmigalwın a came dkıtne Mşihoye awste dlatne Turkoye.

 Ha ma maktabzabnaniste, isbutho d’6 u 7 İlül di şato da 1955’yo dıhjim cala dukotho u cala bote da Mşihoye dkıtwın b’Stanbul.

 Hathe latyo sbutho dlı kuthyo lıbole da farsufe yaste latyo mede dlıkmidıc, elo a farsufe dkıtne ba haye u dıhzelın u qatlano, kmahkın ğalabe ftiho mınyo u nişo bıthre du hjomo dsımwo cala dukotho u cala bote da Mşihoye di mditho d’Stanbul. U yawmano dmamtewole naqla hreto lu bolo u qtolğenso dan 1915, dıhjim b’2 yawme cala bote, cala dukane u cala citotho u ğer dukotho da Mşihoye, leşan dmazici u camo, u djıbrile li golutho.

Hol ucdo hın ma farsufe du cameydan dkıtwın bi folhutho d’Turkiya, kımahkın mın zuctho abiciwo dmahti blebe da Mşihoye. Bi sbuthathe u gabo Demoqratoyo da Came mqadamle rmoyto lu parlamento d’Turkiya du yawmano howe yawmo du duxrono haşonoyo dkıtwole nişo dmıqşoci a Mişihoye dfayişiwo. U qoyumo du gabo d’HDP di mditho d’Kocaeli Ömer Faruk Gergerlioğlu bi rmoyto dımqadamle lu parlemento, tlıble du yawmano howe yawmo du duxrono dani dınqili ma haye 6 u 7 İlül dan 1955 u dhowe yawmo du haşo.

U yawmano yawmo di nıkfutho d’Turkiyayo bu tboco froso du zabnawo kmisım tahrik i bcelıdbobutho mqabıl da Rum bi sbutho d’Qufrus. U ba tebe lo şarire dıkmıfrıs kmıhjım cala came Mşihoye lfuth a mabuce ruşmoye di şultonutho 4.214 bote, 4 alfo dukothe da şuğlone, 73 citotho, Knuşto da Yudoye, 2 dayre u 26 madraşyotho mahırwiwo. Bu hjomano dsim cal 73 citotho dmahırwo u şlihiwo a surothathe u mawqıdi u bebzabno qtılwo 15 farsufe.

A dukotho dıhjim aclaye latwın belhude da Rum, elo da Suryoyo, da Armınoye, da Yudoye u ğer came Mşihoyewın. Wi sbuthathe latwa belhude gnowo u tenhibo elo kıtwole nişo, dmitazici a Mşihoye u bebzabno dmitazido i bcelıbobutho da Turkoye mqabıl da came Mşihoye. Hathe nuqto hreto kımtoyo bu maktabzabno d’Turkiya mqabıl da Mşihoye.