Urifi kodorşo plan cal şekolo du NATO dlo me Amerika

BRUKSEL – a zabne haroyani sımle Trump mamle du groşathe mu NATO, wi sbuthathe xlıqla ğamo b’Urifi-dilonoyith cali mşaynutho du qlimo. Lfuth a mawdconwotho dmatila Financial Times d’Amerika me 4 mabuce frişe, Urifi kımtayıb ruhe dımdawım i ithutho du NATO dlo me Amerika. Mawdıc dan athrawotho Urifoye kımtaybi plan leşan Amerika dlowela ğalabe mşalutho bıgawe du NATO.

U froshezwo d’NBC’ste komır da droşani d’Urifi kmisomi b’zabno, d’Amerika fayış lo kubco dımdawmo i mşaluthathe u calathe a rişone d’Britania, Fransa, Almanya; acmaye’ste d’Skandinavia, mabdelın droşe-dlatne heş ruşmoye, leşan dmibayın tahrazto, dgımşahlıfo i mşalutho rişoyto du duyoqo di mşaynutho d’Urifi-dkıtwa holucdo bide d’Amerika.

U nişo di tahraztathe, dmınqolo i mşaluthathe me Amerika l’Urifi bıgawe d’zabno dbeyn 5 hol 10 eşne’yo leşan dlowe kriz b’Urifi. Wu renyano’ste bıthır gıdmiqadım lu rişono Amerikoyo Donald Trump bu zabno du knuşyo du NATO bu yarho d’Hziron dıbqamuthayna. Elo ğalabe mşale Amerikoye’ste saqıbloye’ne dnufqi mu NATO u kımfaşqile xıd veyoco rabo.

İ mşaluthathe’ste kmidoco bu ışmo-SACEUR (Supreme Allied Commander Europe) wu şuhlofo di klaytathe d’Amerika kuthyo b’zabno d’Pentagon kısaymo şuhlofe u kımanqıso u masrafayda. Ban 1951 mabdewole u rabhaylawotho d’Amerika Dwight D.Eisenhowe-dhawi bıthır rişono d’Amerika, i mşaluthathe dcal Urifi. Amerika kıtla adyawma hol 85 alfo folhe b’20 athrawotho frişe d’Urifi.