USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du hethotho di daşto d’Ninwe.

Lfuth i sictho du bnoyo d’Mort Şmuni, mtayıb ucdo hedor 30 dukane d’sıncat mşahılfe bi qastra d’Bahşiqa bi daşto d’Ninwe.

Bu snodo momunoyo du tukoso Amerikoyo du quyomo Emwothoyo ubu taro di tahrazto dışma “hulmono”, i sictho du bnoyo d’Mort Şmuni mqadamla alat, makinat ukull şıkıl d’mone du snoco l’27 dukane d’sıncat mşahılfe bi qastra d’Bahşiqa.

Beyn da dukanani du snoco, kito nagore, hadode, hayote, sayome d’tarce u kawthe du plastik u mtarsone da radoyotho u ğer. Bi netiçe du snodo dımqadamle USAİD, a 27 dukanani cal dıkmıstacımli fayış makinat du teknik hatho, msarhıb u fulhonathe, u zayıd u produksyonathe u mbayın gade d’fulhono l’farsufe dlatte şuğlone.

Bu dumyano a farsufani fayış kibın dım’amni u mabuco di ciyeşe da yaqrothathe. İ tarmithathe du quyomo momunoyo d’USAİD, simo la came ula tawdiyotho mşahılfotho dıkhoyın b’Bahşiqa, beynothaye falqo rabo mu camaydan u Kaldoyo Suryoyo Othuroyo.

Ba yawmotho dşaficina, i sictho du bnoyo d’Mort Şmuni sımwola socurwotho la 27 dukane da sıncat mşahılfe d’Bahşiqa, wa morthe mahwewolın i fsihuthathe calu snodo dmatilın mu tukoso d’USAİD bu tarbo di tahrazto d’hulmono.