20/06/2020

USCIRF sımle qreyto lı Turkiya dmakliyo ahjomeyda dcala qalilotho

U Komisyon Amerikoyo di Hirutho Emwothoyto da Tawdiyotho, sımle qroyto d’Turkiya dmaklıyo ahjomayda cala qalilotho tawdithoye dıkhoyın bu Iraq ubı Suriya.

 Bi maqırhonuthathe i mşalonitho du Komisyon Amerikoyo mırla; Ahna kıkurhina ahjomani u Turkiya, lıkowe dhujmo cala qalilotho tawdithoye, lo bu Iraq u loste b’Suriya. Inaqla dothe dmisomi ahjomaniste, gıdgurşina baroyo u zuhorayda!

The US Commission on International Religious Freedom-awkith u Komisyon Amerikoyo di Hirutho Emwothoyto da Tawdiyotho, sımle qroyto d’Turkiya dmakliyo ahjomayda cala qalilotho tawdithoye dıkhoyın bu Iraq ubı Suriya. I mşalonitho du Komisyonano Nadine Maenza, grışla u zuhoro cali aykanoyutho da Ezidoye, du camaydan uda Mşihoye hrene bu Iraq ubı Suriya wu husrono dıktorın ahjomani dıksaymo Turkiya calu gerilla di PKK, cala qlime da qalilothani.

Bi maqırhonuthathe mahkela i mşalonitho cala cuqobe dsimi yawme d’Huşabo dı şafıcina cal 81 dukotho b’Şigor, ba turone d’Qandil u hedor i mditho d’Maxmur bu garbyo du Iraq. A cuqobani d’Turkiya simi, belhude kımo yawme bıthır mıd 200 yaqrotho da Ezidoye daciriwo la botathe b’Şigor-bıthır mi goluthathe mcal fothe du qtolğenso dsımwole Dacış aclaye.

Maenza mırla; Ahjomani d’Turkiya xlıqlın ğamo rabo lo belhude elayna elo lıbritho kula. Turkiya kımdacyo di PKK mtaybowa plan dıhjome qaşye, elo bi sbuthathe layto ithbate dgımisamwo hjome acla u calathe kımfaşqina a 81 hjomani d’Turkiya, hjome di zuctho udi jarazıziye. Bebzabno kımahweste, d’Turkiya lo mhela baroyo ba nişe, elo abico belhude dmazico u camo.

Bi maqırhonuthathe Maenza bşıkıl rwiho mahkela calu qtolğenso dsımwole Dacış cala Ezidoye ucalu camaydan, a htofe, u cnufyo wa qatle barbroye dhawın cala camani wa fulhone dıkmisomi, leşan u bnoyo u hethotho da dukothathe. I mşalonitho mırlaste; A Ezidoye wa Mşihoye du qlimano, kıtte sniqutho rabtho dıqudri dımdabri ruhaye, dımşakli hayle di mşaynutho leşan u sutoro da dukothathe.

Maenza mırla; A hjomani d’Turkiya, egartho baroyto la qalilothanine, dılo ducri la dukothathe a şerşoyeyo. Meqım şabthoste hawilan droşo aydarbo Turkiya kımaydo u kıdayşo i hirutho tawdithoyto da qalilotho tawdithoye, beynothaye a Mşihoye du garbay madınho d’Suriya. Ahjomani kmisomi lfuth u plan d’Erdoğan, dkobıc belhude dgorış u zuhoro du kenşo Emwothoyo mi aykanoyutho dkito bu athrayde, mathlo bi sbutho du momuno, wu koalisyon da hfuxye dıkmdawmi dzaydi mqabıl dide.