USUP mhanele u gabo d’GHS bu yawmo şatonoyo di mşatsonuthayde

Camgabıdathe, u gabo du Huyodo Suryoyo Tibeloyo d’USUP mahnele u gabo d’GHS bu yawmo şatonoyo di mşatsonuthayde, u mawdacle dkıtle tuxlono u sabro rabo bu ağuno dkobe laşan di sbutho umthoyto du camaydan d’Suriya.

Bi cohnutho dşafıc 16 eşne cali nfaqto du gabo du Huyodo Suryoyo d’Suriya, u rişono du gabo du Huyodo Suryoyo Tibeloyo İbrahim Murad, bışme udi mdabronutho uda hadome du gabo, mşadarle egartho da tahnyotho la 2 rişone zawgoye d’GHS, uli mdabronutho ula hadome du gabo kulle.

Murad bi egarthayde mawdacle d’GHS lfuth a mkone nacime dkıtle mqadamle dbihuthnafşo u hule ağuno mtakso eşne yarixe ubı darboe mşahılfe diplomatiqoyo, folitiqoye, folhoye, camoye, kenşoye u marduthoye, bnişo dımdawım u camaydan dfoyış cal rağlothe mqabıl da rejime diktator uda tukose marıhbone dsımlın hawbe rabe. Murad mawdacle’ste d’GHS, cıl mıd mahwe delqubloyutho bu ağunayde me hın man abne dkıtne mha bayto, elo nalqa hreto makşarle bu nqolo di sbutho du camaydan u Suryoyo la platforme qlimoye u Emwothoye, bnişo dfoyış u camaydan bu cafrayde u dmitahwele a zedqayde a ruşmoye.

Murad mırle; Hatu mathbatxu ba şartat casqe dkulle dkıtatu i kefo asasi du haykılo di sbuthaydan i Suryoyto udu madhıbhayda u mqadşo. Kımhanenalxu uktılbinalxu kuşore aminoye, ukıtlan sabro dımdawım u ağunathxu bu darbo d’hawrayna u mvayco Sacid Malke uda sohde kulle dmahıtlın i şetısto qamyto di nfaqto du gabo du Huyodo Suryoyo d’Suriya”.

Murad bu huthomo di egarthayde, mawdacle du camaydan mahıtle u sabrayde aclayxu dmadıcritule i mhadronutho di mdinoyuthayde, u dtretu dhowe şoriko kamilo cama came hrene dıkfulhi li hirutho, li demoqratoyutho, li kinutho ulu myodo da zedqe b’bethnahrin.