Volodemir Zelenski mawdacle du athrayde hadiroyo layna şıkıl d’bazare laşan dmitatım u qrobo

KIEV – U rişqutno d’Ukraina Volodemir Zelenski, athmıl bu mamlayde u yawmonoyo meqım mdımşarın adyawma a’bazare du şlomo bi mditho d’Satmbul mırle “Ukraina hadırtoyo Layna şıkıl ma şıklat da bazare. U ahna latna zayoce ma knuşye dı Turkiya”. 

Zelenski mırle ste “gıdnotarno laşan dhozeno manyo dgıddothe m’Rusya, ubıthır mathe gdımbayano a’dawsat dıklozım Ukraina dımhalqolın”. 

Meqım mdımşarın adyawma a’bazare du şlomo bayn d’Rusya u Ukraina b’Stambul, sim knuşyo bi mditho d’Anqara bayn d’Zelenski wu baramnayde dı Turkiya Rejeb Tayeb Erdoğan. 

Camgabıdathe, mşalo Ukarinoyo bi maqırhonutho dhule adyawma l’Reuters, mawdacle d’Zelenski bıthır mi ytawtayde cam Erdoğan, gıdmoyıd fusqono bi sbutho da droşe cam Rusya b’Stambul. 

Rusya mşadarla l’Stambul taşdarto dıkmişaklo mı mcadrone u tahlufe da wazire laşan dsaymo bazare baroye du şlomo cam Ukraina. A’bazarani a’qamoyene dıkmisomi bayn da tre athrawotho mu rbico di şato da 2022, elo lıkmıştawtaflın u rişqutno d’Rusya Valdimer Putin. 

M’gabo hreno, u notarrozo gawonoyo d’Emwotho Mhaydotho Antonio Guteres mzaharle du qonuno emwothoyo gıdcoyıq wu şğuşyo gıdmibarbız ba n’athrawotho mşahılfe dıbritho, in dothe dlımakşıri a’bazare bayn d’Rusya u Ukraina, udmişarır şlomo kino dkımyaqır i hdoyutho da n’arcotho d’Ukraina. 

Guteres bu mamlo dsımle athmıl bu konferans d’Berlin mırle ste “ulsoyoyo ğalabe bu cedonano ducdo dhowe u qonuno emwothoyo şalito. Uloste inaqlayo gıdfıthina u Darbo b’qamuthıd du şğuşyo dgıdmibarbız bıbritho”.