Waziro Australoyo Enver Erdoğan makadle u snodayde li tarmitho du şetoso d’madraşto dilonoyto Othuroyto bı Melbourne

I qadişutho du fatıryarxo di cito d’Madınho d’Othuroye bu Ciraq ubıbritho Mor Awa Tlithoyo Roel, mıstaqbele bu qentrunayde u fatıryarxoyo bi hiğmonutho d’Arbil, u qoyumo Australoyo folitiqoro Enver Erdoğan dkıtyo waziro bi şultonutho di marcitho d’Victoria. 

Bi ytawtathe, driş u renyo di tarmitho dmişatso i madraşto Othuroyto d’Mor Yusıf du maşıqlo şarwoyo bi mditho d’Melborn b’Australia. Wu waziro Erdoğan makadle u snodayde lu insiyativano dkıtyo ulsoyo. 

Camgabıdathe, fatıryarxo Mor Awa makadle da madraşyotho Othuroye di marcitho d’Australia kmıştacın dawro dinamikoyo ba haye du kenşo Othuroyo udu kenşo rwiho, lo balhude bu darbo du nfoqo du moro lu leşono uli hiyoyutho marduthoyto, elo bu darbo du teqwiyo di haymonutho Mşihoyto wi mşablonutho du kenşo b’şıkıl gawonoyo. 

Mxasra hreto, bi ytawtathe drişi sebwotho mşahılfe, baynothaye i aykanoyutho d’Suriya, wi ulsoyutho dmıbne athro dıkmıhkım bu qonuno. Bu tarano, a’tre gabe makadlın dıklozım dmınfıq moro la zedqe da came umthoye u tawdithoye mşahılfe dıkhoyın b’gawıd du kenşo d’Suriya. 

M’gabo hreno, u waziro bi şultonutho di marcitho d’Victoria d’Australia Enver Erdoğan mqalasle u qlimo d’Kurdistan du Ciraq dkıtyo mathlo bu madınho mescoyo di ciyeşe mşayanto bayn da Mşihoye uda came hrene.