Yawmo komo meqım 3 ışne uhjomo d’Dacış cali Daşto d’Ninve

Şafıc tlotho eşne, calu qtolğenso dsımwole u tukoso marhıbono d’Dacış calu camaydan ucala Ezidoye bi daşto d’Ninve bu garbyo du Iraq. Işto bu yarho d’Ob, yawmo hreno komo bu makthabzabno du camaydan u Kaldoyo- Suryoyo-Othuroyo-Oromoyo’yo.

 Işto u şawco bu yarho d’Ob da 2014, kbışwolın a marhıbone i daşto d’Ninve ubi netije, jbırwo u camaydan hawıl naqla bu makthabzabnayde dıtore ma dukothayde u dhowe galwoyo bu athro, dıbnewolın anabohothayde.

7 bu yarho d’Ob dkıtyo u yawmo şatonoyo du qtolcamo barbıroyo dsımla i mdabronutho du Iraq ban 1933 cal Simele ucala qıryawotho hrene du camaydan du garbyo du Iraq, hawi u siqumano bu dorano da 21 yawmo hreno komo bı gwine du makthabzabno di noşutho. Elo camgabe du qtolğensano, a ğrobe marhıbone d’Dacış’ste cabiriwo li mditho d’Mawsal me 10 uhol 17 Hziron da 2014.

Bu şuroyo du yarho d’Ob, camgabe dıkbışwole i daşto d’Ninve, mabdewolınste a marhıbone u qtolğenso calu camaydan ucala Ezidoye, wu 6 u 7 bu yarho d’Ob da 2014 bdewole u camaydan dmahzım mi daşto d’Ninve, dilonoyith lu qlimo d’Kurdistan. Bi netije du kboşano d’Dacış, jbırwo u camaydan inaqla naqla bu makthabzabnayde dmaxle a dukothayde u dhowe galwoyo bu athro dan abohothayde.

Belhude i qastra d’Telesqof fayışowa bu duyoqo da Haylawotho di Daşto d’Ninve udi peşmerge du qlimo d’Kurdistan. Wu eşne yarixe, cayış u camaydan galwoyo ubı aykanoyutho mahişonitho u lhiqoyowe, dıqodır docır la dukothayde. Dacış qum cayne dıbritho sımwole qtolğenso u mahrawwole a bote, a citotho, a dayre wan athare du camaydan, bnişo dıqoşıc i hiyoyutho wi ithuthayde bu athrayde Bethnahrin.

I mcadronutho dıkmotewole u camaydan, ma şutose u tukose du camaydanwe; cal di mcadronutho da tukose Emwothoye u dı Amerika mişadrowa baroyo la maşıryotho, wu camaydan dıkhoyewo ba citotho, ba dayre uba karavanat lo motewole mede mi mcadronuthathe. Bıthır mıd ğlıbwo Dacış bu yarho d’Konun u qamoyo da 2017 bu Iraq, mabdewo tarmıyotho du bnoyo udu hethotho da qıryawotho u mdinotho di daşto d’Ninve.

Sahmo rabo mu camaydan bıdewole naqla hreto dmaftıl fothe lafa dukothayde a şerşoye u dbone a hayayde me hatho. Elo a gzome lo kalın wa hayle şica dıkmısnodi mu İran kıbci dsaymi şuhlofo demoğrafoyo bu qlimo.Wu camaydan mdawamwole u tlobo da zedqayde, da Ezidoye uda qalilotho hrene, bnişo dı qudri dımdabri ruhayde u dsaymi u duyoqo di mşaynutho da dukothathe a şerşoye.