05/12/2020

Yurdnon u İsroyel drışlın cali sbutho dı Fleşt

Bi ytawto dhawyo beyn du waziro di baroyutho d’Yurdnon Ayman Safadi udu baramnayde d’İsroyel Gabi Aşkenazi, kıle cali ulsoyutho dmitabdın naqla hreto a droşe beyn di şultonutho d’İsroyel u da Fleştoye. İ ytawtatheste athyo lu huwoyo kımo yawme, bıthır mu rişono da Fleştoye Mahmoud Abbas sımwole socurutho l’Yurdnon u lğer athrawotho Caraboye leşan u snodo di sbutho da Fleştoye.

Abbas hawile droşe camu rişqutno d’Mısır u camu notarozo gawonoyo du Huyodo Caraboyo. A socurwothaniste simi bıthır mıd Joe Biden qmırwole a guboye di rişonutho d’Amerika me Donald Trump. A droşe beyn Yurdnon u İsroyel sımle calu thumo beyn Yurdnon u Dıffa i Macırboyto u bu yawmoyo kıle dilonoyith cali ulsoyutho du terkiwo dathro Fleştoyo şaryo leşan dmitakle u krizano dcam İsroyel.

U waziro Yurdnoyo mırle; Layto ğer alternativ, jğer mu terkiwo d’2 athrawotho şarye. Meqım yarho mawdacwolın a Fleştoye dgımcadli u kordinasyon da esorathe cam İsroyel. A esorani kalınwo bu yarho d’İyor bıthır mıd İsroyel mawdacwola i tahraztayda du kboşo d’Dıffa i Macırboyto. Bebzabno u waziro du sutoro d’İsroyel Benny Gantz sımle athmıl qroyto la Fleştoye dı ducri li tablitho da droşe leşan u şroyo du kriz dbeynothaye.

Gantz tlıbleste dmabdın methcadronutho beynothaye mqabıl du pandemi di Corona u mırle; U Madınho Mescoyo kfoyıt ucdo b’maşıqlo d’şuhlofe u hano leşan u yuthronathxuyo, ducritu li tablitho da droşe du şlomo cam Tel Aviv. Hadirena dhowina mcadrone bu feroqo du vaksin u gıdmaşena a tedbire leşan a İsarloye dılo cubri la dukotho da Fleştoye. Kıbcinaste dmabdena tarmıyotho leşan u endustri, du energi, da maye udi zaricutho.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…